Azərbaycan Respublikasının Əməkdar mühəndisi, ölkədə caz mədəniyyətinin tanınmış himayədarlarından və təşkilatçılarından biri Nuri Əhmədov vəfat edib.
Onun vəfatı barədə yaxınları və həmkarları sosial şəbəkələrdə məlumat yayıblar.
Nuri Əhmədov Azərbaycan cazının inkişafında mühüm rol oynayıb. O, 2015-ci ildə fəaliyyətini dayandıran Bakı Caz Mərkəzinin təsisçisi olub və uzun illər Bakı Beynəlxalq Caz Festivalının keçirilməsinə dəstək verib. 2005–2007-ci illərdə N.Əhmədov International Baku Jazz Festivalının təsisçisi və sponsoru kimi çıxış edib.
Onun dəstəyi ilə caz mədəniyyəti ilə bağlı bir sıra layihələr də həyata keçirilib. Bunlar arasında 2004-cü ildən nəşr olunan "Jazz Dünyası" jurnalı, 2005-ci ildə yaradılan Jazz.Az saytı və "Jazz in Azerbaijan" antologiyası da var.
Nuri Əhmədov, həmçinin "Cazın dostları" ictimai təşkilatına rəhbərlik edib.
N.Əhmədovla vida mərasimi bu gün, sentyabrın 24-də saat 11:00-da Təzə Pir məscidində keçiriləcək.
