Bu gün keşiş Valetnin günüdür. Başqa adı ilə Sevgililər günü. Və nə qədər qəribə görünsə və səslənsə də, kişilərin təbrik olunduğu yeganə bayram. Hələ o da sevəni olan kişilərin.
Niyə bu qənaətə gəldiyimizi əsaslandırmağa çalışsaq, qeyd edə bilərik ki, bir çox ölkələrdə Beynəlxalq Kişilər Günü (19 noyabr) qeyd olunsa da, Azərbaycanda bu tarix qeyd olunmur. 8 Mart – Beynəlxalq Qadınlar Günü ölkədə çox populyardır və böyük miqyasda qeyd olunur. Bu fərq bəzən cəmiyyətdə "kişilər üçün xüsusi gün yoxdur" fikrinin yaranmasına səbəb olur. Cəmiyyətimizdə kişilər çox vaxt təşəbbüskar tərəf kimi görülür: hədiyyə almaq, sürpriz etmək və münasibətdə romantik addımlar atmaq kimi rollar onlara aid edilir. Buna görə də bəzi insanlar 14 fevralı kişilərin də diqqət görməsi üçün bir fürsət kimi təqdim edir. Bu, əslində münasibətlərdə qarşılıqlı hörmət və qayğının vacibliyinə diqqət çəkən bir yanaşmadır. Amma mənə elə gəlir ki, gərək bizim ayrıca kişilər günümüz də olsun.
Nostalgiya kimi çıxmasın, zaman o zaman idi ki, "Kişilər günü" 23 fevralda qeyd edilirdi — Sovet ordusu və Hərbi Dəniz Donanmasının yarandığı gün. İlk dəfə 1918-ci ildə Qızıl Ordunun yaradılması ilə bağlı qeyd olunmağa başlanan bu günü zamanla sadəcə hərbçilər yox, ümumilikdə bütün kişilər bayram edirdi. Azərbaycanda da bu gün xüsusi qeyd edilirdi. Amma indi nə SSRİ var, nə də o günlər. İndi müstəqil Azərbaycanın rəşadətli ordusunun yarandığı gün var – 26 iyun. Əlbəttə, bu gün dövlət səviyyəsində xüsusi olaraq qeyd edilir. Amma sıravi insanların düşüncəsində 26 iyun hələ ki kişilər günü oturuşmayıb sanki... Bəlkə də bir vaxtlar torpaqların işğal altında qalmağı da öz təsirini göstərib ki, kişilər hansısa günü xüsusi qeyd etməyi özləri üçün ayıb biliblər. İndi isə hər şey gözəldir: ordumuz möhtəşəm zəfər əldə edib, separatçılara başçılıq edənlərə elə bir neçə gün öncə ömürlük həbs verilib. Azad edilən ərazilərdə sürətli köç prosesi davam edir, tikinti-quruculuq işləri pik həddədir. Demək, Azərbaycanda ayrıca olaraq kişilər gününün qeyd olunması üçün bəhanə də var.
Kamran Rza
