Bu gün Xalq artisti Rafael Dadaşovun ölümündən 6 il keçir.
Mərhum aktyor 1946-cı il yanvar ayının 4-də Zaqatala rayonunda anadan olub. 1972-ci ildə M.Əliyev adına Azərbaycan Dövlət İncəsənət İnstitutunu bitirib. 1976-cı ildən ömrünün sonunadək Akademik Milli Dram Teatrında çalışan aktyor bu sənət ocağının səhnəsində dünya və milli dramaturgiya nümunələri əsasında hazırlanmış tamaşalarda müxtəlif xarakterli yaddaqalan dramatik və tipik obrazlar yaradıb.
Rafael Dadaşov səhnədə qazandığı uğurları kinofilmlərdə də təkrarlamağa nail olub. Çəkildiyi "Var olun, qızlar", "Yarımçıq qalmış serenada", "Bəxt üzüyü", "Mənim ağ şəhərim" bədii filmlərində, həmçinin "Mehmanxana sahibəsi", "Səni axtarıram", "Bağışla", "Yollar görüşəndə", "Topal Teymur", "Ordan-burdan", "Mənim günahım", "Göz həkimi" və s. televiziya tamaşalarında aktyor ustalığını nümayiş etdirərək tamaşaçıların rəğbətini qazanıb.
Yaradıcılıq uğurları yüksək qiymətləndirilən sənətkar 1987-ci ildə "Əməkdar artist", 2006-cı ildə "Xalq artisti" fəxri adlarına, 2019-cu ildə "Şöhrət" ordeninə layiq görülüb. 2008-ci ildən Prezidentin fərdi təqaüdçüsü idi.
Qeyd edək ki, Xalq artisti Rafael Dadaşov gənclik illərində xarici görünüşünə görə məşhur fransız kino ulduzu Alen Delona oxşadılırdı. Belə ki, həm sənət dostları, həm də tamaşaçılar onu "Azərbaycanın Alen Delonu" adlandırırdı.
Azərbaycan Dövlət Akademik Milli Dram Teatrının aparıcı səhnə ustası, Xalq artisti, Prezident təqaüdçüsü Rafael Məlik oğlu Dadaşov 2020-ci il mart ayının 16-da, ömrünün 74-cü ilində vəfat edib.
