Bu gün Azərbaycanın tanınmış rep ifaçısı Anar Nağılbazın anım günüdür.
Anar Nağılbaz 1974-cü il martın 28-də Xırdalanda keçmiş deputat Rizvan Cəbiyevin ailəsində dünyaya gəlib. O, Azərbaycan repinin ilk nümayəndələrindən biri hesab olunur və xüsusilə 1993-cü ildə təqdim etdiyi "Narkodünya" mahnısı ilə böyük məşhurluq qazanıb. Yaradıcılığı dövründə "Canlı klip", "Bivəfa", "Xatirə" kimi mahnıları ilə də dinləyicilərin rəğbətini qazanıb. Sənətçi ilk albomunu 1996-cı ildə təqdim edib, 2012-ci ildə isə Bakının Qaraçuxur qəsəbəsində yerləşən Qurban Abbasov adına Mədəniyyət Sarayının direktor müavini vəzifəsinə təyin olunub.
Anar Nağılbaz iki dəfə ailə həyatı qurub. İlk həyat yoldaşı Anjelikadan iki övladı olub. 2018-ci ildə isə Aytən adlı xanımla ailə quraraq onunla birlikdə Masazırdakı ata evində yaşayıb.
Ömrünün son illərində qaraciyər sirrozundan əziyyət çəkən Anar Nağılbaz 2018-ci il avqustun 4-də, 44 yaşında vəfat edib. Azərbaycan mətbuatında onun ölüm səbəbi spirtli içkidən həddindən artıq istifadə nəticəsində baş verən daxili qanaxma kimi göstərilir. Repçi Masazır qəbiristanlığında dəfn olunub.
