Rusiyadan Azərbaycana qayıdan kişi bacısı qızının başını kəsib.
Oxu.az xəbər verir ki, hadisə Abşeron rayonunun Masazır kəndində baş verib.
1967-ci il təvəllüdlü Şakir Rzayev bacısı qızı Türkanın Azərbaycanda əxlaqsızlıq etdiyini eşidib. Daha sonra o, qısa müddətə Azərbaycana gəlib və Türkanın anası ilə bu barədə danışıb. O, bacısına bildirib ki, Türkan ipoteka ilə aldığı evdə yad kişilərlə görüşür. Şakirin bacısı onun dediklərinə məhəl qoymur.
Şakir Masazıra gələrək Türkanla görüşüb və onun barəsində söz-söhbət yayıldığını deyib. Türkan isə əsəbi halda dayısına "Sən kimsən ki, mənim ailə məsələmə qarışasan?" deyib ondan uzaqlaşıb.
Səhəri gün yenidən Türkanın yaşadığı binanın həyətinə gələn Şakir Türkanın işdən çıxmasını gözləyib. Türkan saat 14 radələrində işdən evlərinə nahara gələrkən binanın qarşısında dayısı Şakirlə rastlaşıb və onu evlərinə dəvət edib. Şakir isə ona yenidən barəsində söz-söhbət yayıldığını deyib. Türkan Şakirə üstünə qışqıraraq onun həyatına müdaxilə etmək ixtiyarı olmadığını bildirib. Şakir üzərində gəzdirdiyi bıçağı çıxararaq, ona sifətindən xəsarət yetirəcəyini deyib. Bu vaxt Türkan onun üstünə atılaraq dayısını təhqir edib. Şakir bıçaqla ona xəsarət yetirib. Daha sonra o, binanın giriş blokunda Türkanı yerə yıxaraq, boğazını kəsib. Bununla ürəyi soyumayan Şakir bacısı qızına bıçaqla 4 zərbə endirib.
Türkanın tam öldüyünə əmin olan Şakir həmin vaxt blokda olan qonşuya yaxınlaşaraq, polisə zəng etməsini xahiş edib. Hadisə yerinə polis əməkdaşları gəlib və Şakir təslim olub.
Məhkəmənin hökmü ilə Şakir Rzayev 10 il müddətinə azadlıqdan məhrum edilib.
