"Təhsil müəssisələrinin istiliklə təminatı məsələsi tam nəzarətə götürülüb və qarşıya çıxan problemlərin operativ həlli üçün zəruri işlər görülür".
Bu barədə Bakı şəhəri üzrə Təhsil idarəsindən baku.ws-in sorğusuna cavab olaraq bildirilib.
Qurumun məlumatına görə, təhsil müəssisələrinin istilik təminatı Azərbaycan Respublikası Nazirlər Kabinetinin müvafiq qərarına uyğun, hər il ənənəvi olaraq noyabrın 15-dən başlayır və aprelin 15-dək davam edir:
"Məktəb və bağçaların istiliklə təmin olunmasının normal təşkili üçün davamlı monitorinqlər aparılır, hər hansı problem aşkarlandığı təqdirdə, səbəbi müəyyənləşdirilərək aradan qaldırılması üçün müvafiq tədbirlər görülür, aidiyyəti qurumlara müraciət olunur".
Qeyd olunub ki, BŞTİ-nin tabeliyindəki ümumi təhsil müəssisələrindən 133-ü "Azəristilik" ASC tərəfindən mərkəzləşdirilmiş qaydada, 206-sı fərdi qazanxana vasitəsilə, 4-ü isə fərdi və mərkəzləşdirilmiş qaydada istiliklə təchiz edilir. BŞTİ-nin tabeliyində fəaliyyət göstərən məktəbəqədər təhsil müəssisələrindən 95-i fərdi qazanxana, 116-sı "Azəristilik" ASC tərəfindən mərkəzləşdirilmiş qaydada, 127-si isə kombi sistemi vasitəsilə istiliklə təchiz edilir.
