Bakının Xəzər rayonunda ata və oğul arasında yaranan mübahisə cinayətlə nəticələnib.
Hadisə Buzovna qəsəbəsi, Naxçıvan küçəsində baş verib. 1940-cı il təvəllüdlü İdayət evdə oğlu Müşfiqlə mübahisə edib. Mübahisəyə Müşfiqin işləməməsi, atasının təqaüdü ilə dolanması və atasından evin satılaraq pulunun 30 min manatını ona verilməsini istəməsi səbəb olub. Müşfiq həmin pulla özünə maşın alacağını bildirib.
Mübahisə zamanı İdayət əlindəki bıçaqla Müşfiqin döş qəfəsinin sol tərəfinə zərbə endirib. İdayət ifadəsində hadisə zamanı hər ikisinin spirtli içki qəbul etdiyini, oğlunun nalayiq ifadələr işlətməsindən sonra əsəbiləşərək ona 3-4 dəfə xəsarət yetirdiyini deyib. O, oğlunu öldürmək niyyətinin olmadığını, məqsədinin onu qorxudaraq tənbeh etmək olduğunu bildirib.
Müşfiq isə məhkəmədə atası ilə birlikdə spirtli içki qəbul etdiklərini və aralarında işləməməsi ilə bağlı mübahisə yarandığını deyib. Onun sözlərinə görə, atası qəfil ona zərbə endirib. Müşfiq daha sonra təcili tibbi yardım çağıraraq xəstəxanaya aparılıb.
İdayətə Cinayət Məcəlləsinin müvafiq maddəsi ilə ittiham verilib.
Bakı Ağır Cinayətlər Məhkəməsinin hökmü ilə İdayət 3 il müddətinə azadlıqdan məhrum edilib. Lakin cəza şərti hesab olunaraq 2 il sınaq müddəti müəyyənləşdirilib.
