Bakının Nərimanov rayonunda İran vətəndaşı, 1979-cu il təvəllüdlü Mahnaz xuliqanlıqda ittiham edilib.
Hadisə 2024-cü il martın 19-da Nərimanov Rayon Polis İdarəsinin 16-cı Polis Şöbəsində baş verib. Mahnaz polisə müraciət edərək münasibətdə olduğu Türkiyə vətəndaşı Sinanla ev və avtomobil üstündə yaranan mübahisəni öz xeyrinə həll etmək istəyib.
Lakin Sinan şöbəyə münasibətdə olduğu digər qadın – Qərənfillə gəlib. İki qadın arasında mübahisə düşüb və Mahnaz Qərənfilə xəsarət yetirib.
Mahnaz ifadəsində bildirib ki, hadisədən təxminən 5-6 ay əvvəl Nərimanov rayonunda mənzil alıb və orada yaşamağa başlayıb. Hadisədən iki-üç həftə əvvəl Türkiyəyə gedəndə mənzilin açarını Bakıda yaşayan və Türkiyə vətəndaşı olan tanışı Sinana verib. Sinan da açarı Qərənfilə verib və onlar birlikdə mənzildə yaşamağa başlayıblar.
Mahnaz qeyd edib ki, Qərənfil onun evində yaşayıb və istifadə etdiyi telefonundan özünün çılpaq videolarını Mahnazın ofis nömrəsinə göndərib. Bundan sonra Mahnaz Sinanla mübahisə edib və hadisə yerinə gələndə Qərənfil onu təhqir etdiyinə görə əsəbiləşib.
Zərərçəkmiş Qərənfil isə deyib ki, Sinanla münasibətləri zamanı Mahnazla yazışmalarını görüb və ona zəng edərək münasibətlərini bitirməsini tələb edib.
Daha sonra Mahnazın şikayəti əsasında Qərənfili və Sinanı polis şöbəsinə dəvət ediblər. Polis şöbəsində Mahnaz ona hücum edib, üzünə və çiyninə zərbə endirib.
Nərimanov Rayon Məhkəməsinin hökmü ilə Mahnazın əməli Cinayət Məcəlləsinin 127.1-ci maddəsinə tövsif olunub və o, aylıq qazancının 15 faizi tutulmaqla 1 il islah işlərinə məhkum edilib. Həmçinin 600 manat cərimə ödəməsinə qərar verilib.
Həm təqsirləndirilən, həm də zərərçəkmiş tərəf qərardan apellyasiya şikayəti versə də, Bakı Apellyasiya Məhkəməsi şikayətləri təmin etməyib.
