Bakıda kişi həyat yoldaşını dabankeşlə döyüb.
Bakuplus.az-ın əldə etdiyi məlumata görə, hadisə paytaxtın Sabunçu rayonunda, ailənin birgə yaşadığı evdə baş verib.
İş materiallarına görə, təqsirləndirilən Namiqlə həyat yoldaşı Aygün arasında mübahisə yaranıb. Buna səbəb qadının ərini təhqir etməsi olub. Əsəbiləşən ər dabankeşlə həyat yoldaşının baş və boyun nahiyələrinə bir neçə dəfə zərbə endirib.
Nəticədə qadın müxtəlif dərəcəli bədən xəsarətləri alıb. Faktla bağlı Cinayət Məcəlləsinin qəsdən sağlamlığa zərər vurma maddəsi ilə cinayət işi başlanılıb və iş məhkəməyə göndərilib.
Məhkəmə iclasında təqsirləndirilən şəxs əməlindən peşman olduğunu, həyat yoldaşı ilə barışdığını bildirərək iş üzrə icraata xitam verilməsini xahiş edib. Zərərçəkmiş qadın da ərizəsində həyat yoldaşı ilə barışdığını, ona qarşı hər hansı şikayət və tələbinin olmadığını qeyd edib.
Bakı şəhəri Sabunçu Rayon Məhkəməsinin qərarı ilə tərəflərin barışması nəzərə alınaraq cinayət işi üzrə icraata xitam verilib. Qeyd edək ki, adlar şərtidir.
Əsmər Sənani
