Bakının Qaradağ rayonunda 36 yaşlı oğlan həyat yoldaşına xəsarət yetirib.
Demokrat.az-ın əldə etdiyi məlumata görə, hadisə ötən ilin martın 22-də rayonun Lökbatan qəsəbəsində baş verib. 1990-cı il təvəllüdlü Daşqın həmin gün saat 16:30-da birgə yaşadıqları mənzildə aralarında qısqanclıq zəminində yaranmış mübahisə zamanı arvadı Fatimənin bədəninin müxtəlif nahiyələrinə əlləri ilə bir neçə dəfə vurub. Ona müxtəlif dərəcəli bədən xəsarətləri yetirib.
Bundan başqa, o, həmin ilin iyunun 6-da, saat 8 radələrində avtobus dayanacağında Fatimənin bədəninin müxtəlif nahiyələrinə bir neçə dəfə əlləri ilə vurub. Həmin vaxt Fatimə əri Daşqını başqa qadınla görüb. Buna görə də Daşqına yaxınlaşaraq irad tutub. Söhbət davaya çevrilib və Daşqın Fatiməni döyüb.
Fatimə Daxili İşlər Nazirliyinin 102 qaynar xəttinə zəng edərək, hadisə barədə məlumat verib.
Qaradağ Rayon Məhkəməsinin hökmü ilə Konstitusiya və Suverenlik İli" münasibətilə amnistiya elan edilməsi haqqında Milli Məclisinin 19 dekabr 2025-ci il tarixli qərarının müvafiq bəndi tətbiq edilib, təqsirləndirilən şəxs cinayət məsuliyyətindən azad edilib və barəsində olan cinayət təqibinə xitam verilib.
