Bu gün günorta saatlarında İçərişəhərdə yerləşən Cümə məscidinə gələn vətəndaşlar qəribə vəziyyətlə üzləşiblər. Belə ki, namazdan sonra üzünü yumaq və ya dəstəmaz almaq üçün məscidin arxa tərəfində yerləşən ayaqyoluna gedən ziyarətçilərdən 5 manat ödəniş tələb olunub.
Bakuplus.az-ın məlumatına görə, bu barədə vətəndaşlardan biri sosial media hesabında yazıb.
Vətəndaşın sözlərinə görə, o, üzünü yuyub çıxdıqdan sonra ayaqyolunun qapısında gözləyən şəxs "içəri giriş 5 manatdır" deyərək pul istəyib. Eyni hal dəstəmaz alan başqa bir şəxslə də təkrarlanıb.
Məlumata görə, ayaqyoluna girmək istəyən digər bir şəxs 5 manat ödəniş tələb olunduğunu eşidib geri qayıdıb. Onunla birlikdə gələn qadın da vəziyyətdən narazılığını gizlətməyib.
"Heç ən bahalı parkinq belə, saatı 2 manatdan baha deyil. Amma maksimum 5 dəqiqəlik ayaqyolu üçün 5 manat istənilməsi insanı təəccübləndirir", - deyə şikayətçi bildirib.
Qeyd edək ki, sözügedən ayaqyolunun məscidə, yoxsa yaxınlıqdakı fərdi obyektlərdən birinə məxsus olduğu dəqiq bilinmir.
