5 avqust tanınmış müğənni və aktrisa Firəngiz Rəhimbəylinin doğum günüdür.
O, 1958-ci ildə Bakı şəhərində, Lökbatan qəsəbəsində anadan olub.
Firəngiz Rəhimbəyli 1980-ci illərdə Azərbaycan estradasının sevilən simalarından birinə çevrilərək həm musiqi, həm də kino sahəsində uğurlu fəaliyyət göstərib. Rafiq Babayev, Eldar Mansurov və Oqtay Kazımov kimi məşhur bəstəkarlarla əməkdaşlıq edərək "Əgər məni unutsan", "Bu sevgi", "İnanıram sevgiyə", "Bizim dağlar" və digər populyar mahnıları ifa edib.
Firəngiz Rəhimbəylinin aktrisa kimi ən böyük uğuru 1991-ci ildə çəkilmiş "Bəxt üzüyü" filmində canlandırdığı Sevda obrazı olub. Bu rol ona böyük şöhrət qazandırıb və Azərbaycan kinosunun yadda qalan qadın obrazlarından birinə çevrilib. 2017-ci ildə çəkilən "Bəxt üzüyü 2" filmində də yenidən Sevda obrazını canlandırıb.
1993-cü ildən etibarən ABŞ-ın Los-Anceles şəhərində yaşayan sənətçi yaradıcılıq fəaliyyətini burada da davam etdirib. O, 16 avqust 2022-ci ildə Los-Ancelesdə ürək tutması nəticəsində vəfat edib.
