Bakının Xəzər rayonunda 2003-cü il təvəllüdlü Həsrət dayısının həyat yoldaşı Vüsaləyə (adlar şərtidir – red.) xəsarət yetirib.
Demokrat.az-ın məlumatına görə, hadisə onların birgə yaşadıqları evdə baş verib. Həsrət Vüsalə ilə aralarında yaranan mübahisə zamanı təpiklə onun bel nahiyəsindən vurub. Hadisə ilə bağlı Həsrətə Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Təqsirləndirilən şəxs ifadəsində özünü təqsirli bilməyərək deyib ki, mübahisə hamam otağında baş verib və əksinə, Vüsalə ona ayaqqabı geyilənlə xəsarət yetirib. Zərərçəkmiş Vüsalə isə bu iddianı təkzib edərək, Həsrətin onu təpiklə vurduğunu və bundan sonra DİN-in 102 qaynar xəttinə müraciət etdiyini deyib.
Xəzər Rayon Məhkəməsinin hökmü ilə Həsrətə 6 ay müddətinə azadlığın məhdudlaşdırılması cəzası təyin edilib.
Həmçinin təqsirləndirilən şəxsin kütləvi tədbirlərdə iştirakı qadağan edilib. Hökmün icrasına nəzarət Bakı Şəhər Probasiya İdarəsinə həvalə olunub.
