Bakının Nərimanov rayonunda 29 yaşlı kişi qısqanclıq zəminində yaranan mübahisə zamanı arvadına xəsarət yetirib.
Demokrat.az xəbər verir ki, hadisə ötən ilin noyabrın 15-də baş verib. Bakı şəhər sakini Əhməd həmin gün saat 22 radələrində yaşadıqları ərazidə, "Yaşıl Bazar"ın arxa çıxışının yaxınlığında idarə etdiyi "Chevrolet Aveo" markalı avtomobilin içində arvadı Səbinə (adlar şərtidir) ilə mübahisə edib.
Bu zaman o, arvadına bir neçə dəfə yumruqla zərbə vuraraq ona xəsarətlər yetirib.
Faktla bağlı Əhmədə Cinayət Məcəlləsinin 128-ci maddəsi ilə ittiham irəli sürülüb.
O, ifadəsində özünü təqsirli bildiyini deyib və "Konstitusiya və Suverenlik İli" münasibətilə amnistiyanın tətbiq edilməsini xahiş edib.
Nərimanov Rayon Məhkəməsinin hökmü ilə amnistiya tətbiq olunub, Əhməd cinayət məsuliyyətindən azad edilib və iş üzrə icraata xitam verilib.
