Bakıda sevgilisinə davamlı olaraq işgəncə verən şəxs həbs edilib.
37 yaşlı Elçin Qəmbərov (şərti adla) 2 ilə yaxındır bir yerdə yaşadığı qadını dəfələrlə döyüb, eləcə də fiziki və psixi işgəncələr verib.
İttiham aktına görə, Elçin ondan icazəsiz ad günü məclisinə getməsinə görə yumruqla sevgilisi Günayın (şərti adla) baş və bədəninin müxtəlif nahiyələrinə çoxlu zərbələr vuraraq, xəsarətlər yetirib. Həmçinin dəmir tava ilə Günayın əllərinə və bud nahiyələrinə çırparaq, fiziki işgəncə verib.
Fakt əsasında Elçin Qəmbərov polis əməkdaşları tərəfindən saxlanılaraq, barəsində Cinayət Məcəlləsinin müvafiq maddələri ilə cinayət işi açılıb.
Təqsirləndirilən şəxs ifadəsində günahını boynuna almayıb. O, sevgilisinə işgəncə vermədiyini dilə gətirib.
Zərərçəkən qadın isə Elçinlə bir-birlərini çox sevdiklərini, sevgilisini bağışladığını bildirib. Onun sözlərinə görə, hər ikisi bir dəfə ailəli olub ayrılıblar. Hər birinin 2 övladı var. Günay bildirib ki, bir-birilərini çox istəsələr də, ailələri evlənmələrinə razı olmur. Bu şikayəti də ailəsinin təkidi ilə verib.
O, Elçin Qəmbərova qarşı şikayətçi olmadığını deyib.
Məhkəmənin qərarı ilə Elçin Qəmbərov 1 il 7 ay 26 gün müddətinə azadlıqdan məhrum edilib.
mənbə: bakupost
