Ali Məhkəmədə Böyük Britaniya vətəndaşı Qrir Kristoferi hədə-qorxu ilə şantaj edərək külli miqdarda pul almaqda təqsirləndirilən Elnarə Nəsrəddinova və Yasəmən Məmmədovanın kassasiya şikayətinə baxılıb.
Hakim İlqar Qılıcovun sədrliyi ilə keçirilən prosesdə kassasiya şikayəti təmin edilməyib və əvvəlki məhkəmə qərarı qüvvədə saxlanılıb.
İttihama görə, Elnarə Nəsrəddinova ötən il martın 26-da Fəvvarələr meydanı yaxınlığında tanış olduğu Böyük Britaniya vətəndaşı Qrir Kristoferi mənzilinə aparıb. Burada Yasəmən Məmmədova ilə birlikdə zərərçəkmişin çılpaq fotolarını çəkərək onu rüsvayedici məlumatları yaymaqla hədələyiblər. Daha sonra hədə-qorxu yolu ilə ondan 205 min 823 manat alıblar.
Bakı Ağır Cinayətlər Məhkəməsinin hökmü ilə Elnarə Nəsrəddinova 11 il müddətinə azadlıqdan məhrum edilib. Yasəmən Məmmədovaya isə əvvəlcə 2 il həbs cəzası verilsə də, Bakı Apellyasiya Məhkəməsinin qərarı ilə bu cəza 1 il 14 gün azadlığın məhdudlaşdırılması (elektron qolbaq) ilə əvəz olunub. Ali Məhkəmə kassasiya şikayətini təmin etməyib.
Qeyd edək ki, zərərçəkmiş Böyük Britaniya vətəndaşı Qrir Kristofer Bakıda özəl şirkətlərdən birində müqavilə əsasında işləyib.
mənbə: pravda.az
