Sabunçu Rayon Məhkəməsində qəsdən sağlamlığa yüngül zərər vurmada təqsirləndirilən İlhamə Qasımzadənin (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Samirə Məmmədlinin sədrliyi ilə keçirilən prosesdə hökm oxunub.
Hadisə 2025-ci il 9 noyabr tarixində, saat 05 radələrində Bakı şəhəri, Sabunçu rayonu ərazisində qeydə alınıb.
İttihama görə, İlhamə Qasımzadə mübahisə zamanı zərərçəkmiş Həlimə Səfərovanın (adı, soyadı şərtidir) boğaz nahiyəsindən tutaraq üz nahiyəsinə şillə vurub, ona xəsarət yetirib. Ekspertiza bu xəsarətlərin dərəcəsinə görə sağlamlığın qısa müddətə pozulması ilə nəticələndiyini təsdiqləyib.
Məhkəmə istintaqı zamanı İlhamə Qasımzadə özünü təqsirli bilmədiyini deyib. O ifadəsində qeyd edib ki, uzun illərdir Sabunçu rayonunun Ramana qəsəbəsində yerləşən kafedə işləyir və 9 ildir Mahal Səfərovla (adı, soyadı şərtidir) qeyri-rəsmi münasibətdə olub, ondan bir övladı var. Onun sözlərinə görə, Mahal həmin dövrdə Həlimə Səfərova ilə rəsmi nikaha daxil olub və bu nikahdan da iki övladı dünyaya gəlib.
Təqsirləndirilənin ifadəsinə əsasən, hadisədən bir neçə gün əvvəl Həlimə onun və uşaqlarının fotolarını "TikTok" sosial şəbəkəsində paylaşaraq nalayiq ifadələr yazıb. Bu səbəbdən o, Həlimənin yaşadığı ünvana gedib və şəkillərin sosial şəbəkədən silinməsini istəyib.
İlhamə iddia edir ki, həmin vaxt mübahisə zamanı Həlimə onun saçından yapışıb və Mahal onu çölə çıxarıb.
Təqsirləndirilən şəxs zərərçəkmişi vurmadığını, ona qarşı irəli sürülmüş ittihamın əsassız olduğunu vurğulayıb.
Məhkəmənin hökmü ilə ona 1000 manat miqdarında cərimə cəzası təyin edilib.
