Bakıda qonşular arasında 30 manat üstündə yaranan mübahisə məhkəmə ilə nəticələnib.
Məlumata görə, hadisə 17 avqust 2025-ci ildə Suraxanı rayonunun Köhnə Suraxanı qəsəbəsində baş verib.
1990-cı il təvəllüdlü Bəhram qonşusu Zəlimxanla gecə saatlarında birlikdə içki qəbul etdikdən sonra mübahisə edib. Səbəb Zəlimxanın bank kartından xəbəri olmadan 30 manat çıxarıldığını düşünməsi və buna görə Bəhramı günahlandırması olub.
Bəhramın ifadəsinə görə, hadisədən əvvəl onlar iki ayrı kafedə birlikdə pivə içiblər. Daha sonra Zəlimxan onu həyətinə dəvət edib və birlikdə araq da içiblər. Kafedə pul göndərilməsi ilə bağlı yaranan qarışıqlıqdan sonra Zəlimxan hesabından 30 manatın çıxıldığını deyərək qonşusu ilə mübahisə edib.
Bəhram bildirib ki, Zəlimxan onu söyüb və yumruqla vurmağa cəhd edib. O isə qonşusunu özündən uzaqlaşdırmaq üçün iki dəfə sinəsindən itələyib. Nəticədə Zəlimxan müvazinətini itirərək yerə yıxılıb və xəsarət alıb.
Bəhram qəsdən sağlamlığa az ağır zərər vurmaqda təqsirləndirilib. O, ittihamı qəbul etdiyini, hadisə zamanı hər ikisinin sərxoş olduğunu və sonradan qonşusu ilə barışdığını bildirib.
Suraxanı Rayon Məhkəməsinin hökmü ilə Bəhram barəsində amnistiya aktı tətbiq edilib və o, cinayət məsuliyyətindən azad olunub.
Mənbə: Demokrat.az
