Bakı Ağır Cinayətlər Məhkəməsində qəsdən adam öldürməyə cəhddə təqsirləndirilən Nicat Rəhimzadənin cinayət işi üzrə məhkəmə iclası başa çatıb.
Hakim Neymət Məmmədovun sədrliyi ilə keçirilən prosesdə hökm oxunub.
İttihama əsasən, hadisə bu il saat 19 radələrində Bakı şəhəri, Xətai rayonu, Əhmədli qəsəbəsində yerləşən çoxmənzilli yaşayış binalarının birinin qarşısında baş verib.
Belə ki, Nicat Rəhimzadə həmin ərazidə yüksək səslə nalayiq ifadələr işlədərək, binanın sakinlərinin və digər şəxslərin dincliyini nümayişkaranə şəkildə pozub. Binada yaşayan zərərçəkmiş Rəvan Məmmədov ailə üzvlərinin və digər insanların narahatlığını aradan qaldırmaq məqsədilə təqsirləndirilən şəxsə irad bildirib.
Zərərçəkmiş şəxs ondan qanunsuz hərəkətlərinə son qoymasını tələb edib.
Bundan əlavə, onun hərəkətlərinin qarşısını almaq məqsədilə Nicatın qolundan tutaraq yaşayış binasının daxilinə çəkməyə çalışıb. Məhz bundan sonra vəziyyət daha da gərginləşib.
Təqsirləndirilən şəxs bıçaqla zərərçəkmiş şəxsin həyat üçün mühüm orqanların yerləşdiyi döş qəfəsinin ön səthinə bir dəfə qəsdən zərbə endirib. Həmin xəsarət ürək və ağciyərin zədələnməsi ilə müşayiət olunub və həyat üçün təhlükəli olan sağlamlığa ağır zərər kimi qiymətləndirilib.
Həkimlərin səyi nəticəsində zərərçəkmişin həyatını xilas etmək mümkün olub.
Hadisədən sonra Nicat Rəhimzadə saxlanılaraq cinayət məsuliyyətinə cəlb edilib. Onun əməli qəsdən adam öldürməyə cəhd kimi tövsif olunub.
Məhkəmənin hökmü ilə cəzasını ciddi rejimli cəzaçəkmə müəssisəsində çəkməklə ona 14 il müddətə azadlıqdan məhrumetmə cəzası təyin edilib.
Qeyd edək ki, ad və soyadlar şərti verilib.
Mənbə: pravda.az
