Paytaxtın Xətai rayonu, Çingizxan Kərimov küçəsi 2 ünvanında yerləşən binanın sakinləri qonşularının həyətdə toyuq-cücə saxlamasından şikayətçidirlər.
Bakuplus.az-a müraciət edən şikayətçinin sözlərinə görə, qonşusu həyətində 50-yə yaxın toyuq saxlayır və bunun üçün üç hin düzəldib.
Sakin iddia edir ki, toyuqların səsi və ərazidə yaranan qoxu gündəlik həyatı çətinləşdirib. Xüsusilə yağışlı və isti havalarda həyətdə kəskin üfunət yarandığı, pəncərələrin açılmasının mümkünsüz olduğu bildirilir.
Onun sözlərinə görə, məsələ ilə bağlı artıq aidiyyəti qurumlara müraciət olunub. Gigiyena və Epidemiologiya Mərkəzinin toyuqların yığışdırılması ilə bağlı rəy verdiyi bildirilir. Lakin şikayətçi problemin hələ də aradan qaldırılmadığını deyir.
"Dəfələrlə özünə demişəm, həyat yoldaşım da danışıb. Amma bizi nəzərə almır. Deyir ki, xoşunuza gəlmir, köçün. Mən ev almışam ki, köçüm?", - deyə sakin narazılığını ifadə edib.
Şikayətçinin sözlərinə görə, binada digər qonşular da vəziyyətdən narazıdır, lakin uzun illərdir qonşuluq münasibətlərinə görə rəsmi şikayət etməkdən çəkinirlər. İki azyaşlı uşağının olduğunu deyən sakin isə əsas narahatlığının antisanitar şərait və bunun sağlamlığa mümkün təsiri olduğunu vurğulayıb.
O, məsələ ilə bağlı aidiyyəti qurumların yenidən araşdırma aparmasını və verilmiş rəyin icrasının təmin olunmasını istəyir.
