Bakının Sabunçu rayonunun Bakıxanov qəsəbəsində 36 yaşlı İlkin sevgi münasibətində olduğu Günelə xəsarət yetirib.
Demokrat.az xəbər verir ki, hadisə ötən ilin mayın 22-də baş verib. Salyan rayon sakini olan İlkin qısqanclıq zəminində aralarında yaranan mübahisə zamanı Günelin sifətinə əl ilə zərbə endirib.
İlkinə qarşı Cinayət Məcəlləsinin 128-ci maddəsi (qəsdən sağlamlığa zərər vurma) ilə ittiham irəli sürülüb və o, özünü təqsirli bilib. Bildirib ki, Azərbaycan Pedaqoji Universitetinin 4-cü kurs tələbəsidir və Günellə münasibətləri tələbə yoldaşlığından sevgi münasibətinə çevrilib. Onun sözlərinə görə, Günelin xəyanət etdiyini düşünərək görüş təyin edib, telefonundakı mesajlara baxdıqdan sonra başqa şəxslə münasibəti olduğunu öyrənib və əsəbiləşərək ona şillə vurub.
Zərərçəkmiş Günel isə bildirib ki, İlkin əvvəlcə ona şillə vurub, daha sonra yumruq zərbəsi endirib. Nəticədə yerə yıxılıb və İlkin tərəfindən hədələnib. O, hadisədən sonra polisə müraciət etdiyini deyib.
Sabunçu Rayon Məhkəməsinin hökmü ilə İlkin aylıq qazancının 15 faizi dövlət nəfinə tutulmaqla 6 ay müddətinə islah işləri cəzasına məhkum edilib.
