Bakı Ağır Cinayətlər Məhkəməsində oğurluq və torpaq zəbt etməkdə təqsirləndirilən 74 yaşlı Qədəm Tarverdiyeva ilə bağlı qərar verilib.
Hakim Fərid Namazovun sədrliyi ilə keçirilən prosesdə onun axtarışa verilməsi, barəsində həbs qətimkan tədbirinin seçilməsi və Bakı İstintaq Təcridxanasına yerləşdirilməsi barədə qərar qəbul edilib.
Dövlət ittihamçısı Qədəm Tarverdiyevanın 7 il müddətinə azadlıqdan məhrum edilməsini təklif edib.
İttihama əsasən, o, müxtəlif vaxtlarda Binəqədi qəsəbəsində zərərçəkənlərə məxsus torpaq sahələrini zəbt edərək qanunsuz tikililər inşa edib. Həmçinin 2023-cü ildə zərərçəkənin həyətinə qanunsuz daxil olaraq müşahidə kameralarını sındırıb və evdən ümumi dəyəri 17 min 600 manat olan məişət əşyalarını oğurlayıb. Digər zərərçəkənin torpağını da mənimsəməkdə ittiham olunur.
Qədəm Tarverdiyeva Cinayət Məcəlləsinin oğurluq və torpaq sahəsini özbaşına tutma ilə bağlı maddələri ilə təqsirləndirilir.
O, 2024-cü ilin iyununda istintaqdan gizləndiyi üçün axtarışa verilib, iyulda saxlanılıb. Barəsində həbsdən kənar qətimkan tədbiri seçilib.
Qeyd edək ki, Tarverdiyeva 2017-ci ildə dələduzluq ittihamı ilə 10 il müddətinə azadlıqdan məhrum edilib. O, 2020-ci ilin aprelində əfv sərəncamı ilə cəzasının çəkilməmiş hissəsindən azad olunub.
mənbə: lent.az
