Bakıda güclü yağış nəticəsində su basan ev qarət olunub.
Hadisə Binəqədi rayonu, Biləcəri qəsəbəsi, Görüş küçəsində baş verib.
36 yaşlı Nurlan Həmzəyev (şərti adla) əvvəlcə Məmməd Səid Ordubadi küçəsində gecə saatlarında balta ilə pəncərəni açaraq, evə daxil olub. Lakin oğurlamağa nə isə tapmadığı üçün evi tərk edib. Özünün sözlərinə görə, 10 gün sonra sərxoş halda Görüş küçəsində yenə pəncərəni açaraq, bir evə girib və ümumi dəyəri 5500 manat olan qızıl-zinət əşyaları oğurlayıb. Oğurladığı qızılların bir qismini Lökbatanda lombarda qoyaraq, 1200 manat pul götürüb. Bir hissəsini isə Lökbatanda 500-600 manata satıb.
Fakt əsasında N. Həmzəyev polis əməkdaşları tərəfindən saxlanılıb və barəsində cinayət işi açılıb.
Təqsirləndirilən şəxs ifadəsində əməlindən peşman olduğunu və zərərçəkənə vurduğu ziyanı ödədiyini bildirib. Buna görə də barəsində azadlıqdan məhrumetmə ilə bağlı olmayan cəza verilməsini istəyib.
Birinci zərərçəkənin sözlərinə görə, şəhid qardaşının doğum günü ilə əlaqədar Neftçala rayonuna, anasıgilə köməyə gedib. Burada 1 ay qalıb. Biləcərinin Görüş küçəsindəki evinə qayıdanda isə mənzilin dağınıq olduğunu gördüyü üçün polisə məlumat verib. Lakin o, evindən heç nə oğurlanmadığı üçün şikayətçi olmadığını bildirib.
Qızılların oğurlandığı ev sahibinin sözlərinə görə isə yağan güclü yağışlar nəticəsində evini su basıb. Buna görə də onlar ailəsi ilə birgə evi tərk edərək qohumugildə qalıblar. Geri qayıdanda isə qızılların oğurlandığını görüb. O, dəymiş zərərin ödənildiyi üçün şikayətçi olmadığını deyib.
Məhkəmənin qərarı ilə Nurlan Həmzəyev 2 il 11 ay 26 gün müddətinə azadlığın məhdudlaşdırılması cəzasına məhkum olunub.
Mənbə: lent.аz
