Bakının Yasamal rayonunda su xəttində qəza baş verib.
Bakuplus.az-ın məlumatına görə, hadisə rayonun Şıxəli Qurbanov küçəsində qeydə alınıb. İçməli su borusunun partlaması nəticəsində küçənin bir hissəsini su basıb.
Bildirilir ki, qəza səbəbindən Qış parkı ərazisində, Akademik Milli Dram Teatrının qarşısında yerləşən yeraltı piyada keçidi də suya qərq olub.
Hadisə nəqliyyatın hərəkətinə də təsirsiz ötüşməyib. Həmin yoldan istifadə edən sürücülər çətinliklə üzləşib, bəzi avtobuslar isə istiqamətini dəyişmək məcburiyyətində qalıb.
Məlumata görə, qəzanın aradan qaldırılması üçün əraziyə İri Şəhərlərin Birləşmiş Su Təchizatı Xidmətinin əməkdaşları cəlb olunub və hazırda təmir işləri aparılır.
