Bakının Nizami rayonunda 60 yaşlı kişi mübahisə zamanı tanışına xəsarət yetirib.
Demokrat.аz-ın əldə etdiyi xəbərə görə, hadisə bu ilin iyunun 17-də, saat 21.00-da baş verib. Bakı şəhər sakini, 1965-ci il təvəllüdlü Vüqar tanışı, 1966-cı il təvəllüdlü Zaurla (adlar şərtidir – red.) ilə nərd oynayarkən sonuncunun zər tutması səbəbindən mübahisə edib.
Vüqar Zauru söyüb. Bu zaman Zaur onun burun nahiyəsindən yumruqla vurub. Vüqar da cavab olaraq Zaurun sifət nahiyəsinə bir dəfə yumruqla zərbə vurub.
Vüqarın barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İşə Nizami Rayon Məhkəməsində baxılıb. Məhkəmə hökm çıxaran zaman təqsirləndirilən şəxsin zərərçəkmişlə barışıq əldə etməsini nəzərə alıb. Bu səbəbdən Vüqarın barəsində olan cinayət təqibinə xitam verilib. O, cinayət məsuliyyətindən azad edilib.
Bundan başqa, Zaurun da Vüqarı vurması ilə bağlı iş ayrıca icraatda araşdırılıb. Bu dəfə isə burun nahiyəsindən xəsarət alan Vüqar zərərçəkmiş qismində tanınıb.
Zaurun barəsində olan cinayət işinə ayrıca icraatda Nizami Rayon Məhkəməsində baxılıb. Hakim onların barışmasını nəzərə alıb və Zaurun barəsində olan cinayət təqibinə xitam verilməsi barədə hökm çıxarıb.
