19 may Azərbaycanın Milli Qəhrəmanı, 2024-cü ilin dekabrında qəzaya uğrayan AZAL-a məxsus "Embraer 190" təyyarəsinin kapitanı olmuş İqor Kşnyakinin doğum günüdür.
İqor İvanoviç Kşnyakin 1962-ci ildə Bakı şəhərində anadan olub. Pilot ixtisası üzrə ilk təhsilini 1982-ci ildə Ryazan vilayətində Sovet İttifaqı Qəhrəmanı Qriqori Taran adına Sasovo Mülki Aviasiya uçuş məktəbində alıb. Həmçinin 1992-ci ildə Rusiya Dövlət Hidrometeoroloji İnstitutunun Meteorologiya ixtisasını bitirib.
Kşnyakin Azərbaycanda ən təcrübəli mütəxəssislərdən biri hesab olunurdu. Onun 15159 saatlıq uçuş təcrübəsi var idi ki, bunun 11180 saatı kapitan kimi həyata keçmişdi.
2020-ci ildə Bakıdan Moskvaya uçarkən Kşnyakinin komandiri olduğu təyyarədə olan sərnişinlərdən birinin halı pisləşib. Kşnyakin təcili eniş edib və sərnişinin həyatı xilas olunub.
2024-cü il dekabrın 25-də Azərbaycan Hava Yollarına məxsus "Embraer 190" təyyarəsi Rusiya hava hücumundan müdafiə qüvvələrinə məxsus "Pantsir-S1" zenit raket kompleksi ilə vurulub. İqor Kşnyakin və ikinci pilot Aleksandr Kalyaninov təyyarənin idarəetmə sistemlərinin sıradan çıxmasına baxmayaraq, təyyarəni Xəzər dənizi üzərindən Aktau Beynəlxalq Hava Limanına yaxın əraziyə yönləndiriblər. Qazaxıstanın Aktau şəhəri yaxınlığında qəza enişi zamanı təyyarə yerə çırpılıb. Qəza nəticəsində İqor Kşnyakin, təyyarənin ikinci pilotu və bir ekipaj üzvü, habelə 35 sərnişin qəza zamanı həyatını itirib. Qəzadan sonra 29 nəfərin sağ qalması İqor Kşnyakin və ikinci pilot Aleksandr Kalyaninovun fədakarlığının, zəhmətinin bəhrəsidir. Ekspertlər onun və komandası haqqında "tarixə qəhrəmanlar kimi düşüblər" ifadəsini işlədirlər. İqor Kşnyakin 29 dekabr 2024-cü ildə II Fəxri xiyabanda dəfn olunub.
Azərbaycan Respublikası Prezidentinin 29 dekabr 2024-cü il tarixli sərəncamı ilə Kşnyakin İqor İvanoviç ölümündən sonra "Azərbaycanın Milli Qəhrəmanı" adına layiq görülüb.
