Bakının mərkəzində tanınmış restoranlardan olan "Paul" piyadalar üçün yolu zəbt edib.
Bakuplus.az xəbər verir ki, bu barədə şəhər sakinləri sosial şəbəkə hesablarında paylaşım edib.
Belə ki, fotoda Abdulkərim Əlizadə və Məhəmməd Əmin Rəsulzadə küçələrinin kəsişməsində yerləşən restoranın yay terrasının piyadalar üçün nəzərdə tutulmuş ərazini zəbt etdiyi görünür.
Nəticədə piyadaların hərəkəti üçün ayrılmış sahə daralır və vətəndaşlar küçə ilə hərəkət zamanı çətinliklə üzləşirlər.
Şəhər sakinləri məsələ ilə bağlı aidiyyəti qurumların araşdırma aparmasını və obyektin yerləşdirilməsinin mövcud qaydalara uyğun olub-olmamasının müəyyənləşdirilməsini gözləyir.
Məsələ ilə bağlı Səbail Rayon İcra Hakimiyyətindən bildirilib ki, sözügedən ünvanda yerləşən qeyri-yaşayış sahəsi aidiyyəti qurumun müvafiq icazə sənədi əsasında mövsümi ticarət fəaliyyəti göstərir:"Əlavə olaraq qeyd edirik ki, görülmüş müvafiq tədbirlər nəticəsində gül dibçəkləri ilə zəbt edilmiş ərazi əvvəlki vəziyyətinə qaytarılıb".
