Bakı – Sumqayıt marşrutu üzrə hərəkət edən "BakuBus"a məxsus 500 nömrəli avtobusdan şikayət var.
Bakuplus.az-a müraciət edən sərnişinlər bildiriblər ki, bu gün səhər saatlarında 99-JB-297 dövlət nömrə nişanlı avtobusun tavanından su birbaşa oturacaqlardan birinə damıb. Nəticədə bunun fərqinə varmayan bəzi sərnişinlər islanmış oturacaqda əyləşiblər, bəzilərinin isə su üzərlərinə tökülüb.
"Dünən xəbərlərdə oxuduq ki, "BakuBus"un avtobusunda tavandan su damır. Xeyli təəccübləndik, hətta gileyləndik də. Şirkətdən də bildirdilər ki, artıq tədbir görülüb. Haradan biləydik ki, bu gün eyni hadisə bizim də başımıza gələcək?! Yəqin "BakuBus"un tədbiri elə də təsirli olmayıb. Bundan sonra şirkətin avtobuslarına gərək çətirlə minək", - şikayətçilərdən bir yazıb.
Xatırladaq ki, ötən gün 7A nömrəli avtobusda sərnişinin üzərinə tavandan su axması ilə bağlı şikayət yayılmışdı. "BakuBus"dan hadisənin avtobusun soyutma sisteminin drenaj xəttində yaranan texniki nasazlıq səbəbindən baş verdiyi və problemin aradan qaldırıldığını bildirmişdilər.
