"Bütün mahnılarımın müəlliflik hüququ məndədir və qorunur. Mənim "Bayatılar" mahnım Türkiyədə "Zalim" adı ilə ifa edilir. Mahnının sözlərini yazan Vahid Əziz də gedib, şikayət edib. "Zalim" mahnısından qonorar tək mənə yox, Vahid Əzizə də gəlir. Mənim "Bayatılar" mahnım sözünə görə yox, musiqisinə görə bütün dünyaya yayılıb. Özü də müxtəlif ölkələrdə hər kəs öz dilində sözlər yazdırıb oxuyur. Vahid Əzizin sözləri isə yalnız Azərbaycanda oxunur. Bütün dünyada bu mahnının musiqisi məşhurdur, sözləri yox. Onlar Vahid Əzizin sözlərini oxumayacaqlar, çünki Azərbaycan dilini bilmirlər".
Bunu moderator.az-a açıqlamasında xalq artisti, tanınmış bəstəkar Eldar Mansurov deyib.
Eldar Mansurov deyib ki, Vahid Əziz "Bayatılar"dan pul qazanır: "Mən Vahid Əzizin öz dilindən eşitmişəm ki, bu mahnıdan o da pul qazanır. Amma nəyə görə qazanır, sözün düzü mənə çatmır. Hər yerdə deyir ki, "Bayatılar" mənim mahnımdır. Sənin sözlərini Azərbaycanda oxuyurlar, Türkiyədə oxumurlar. Azərbaycanda nə qədər ki, bu mahnı oxunur, mütləq Vahid Əzizə qonorar yazılmalıdır. Türkiyədə sözləri Sezen Aksu yazıb. Bunun Vahid Əzizə aidiyyəti yoxdur. Musiqinin də ona aidiyyəti yoxdur".
