8 Mart Beynəlxalq Qadınlar Günüdür.
Qadınların kişilərlə bərabər hüquqlu olmaq uğrunda apardığı mübarizənin başlanğıcı olaraq, 8 mart 1857-ci ildə ABŞ-nin Nyu-York şəhərində geyim sektorunda çalışan yüzlərlə qadının aşağı maaşa, uzun iş saatlarına, eyni zamanda pis iş şəraitinə etiraz olaraq tətil etməsi qəbul edilir.
8 mart 1908-ci ildə Nyu-York Sosial-Demokrat Qadın Təşkilatının çağırışilə 15 min qadın, daha qısa çalışma saatı, kişilərlə bərabər əmək haqqı və səsvermə hüququ üçün nümayiş keçirdi.
1910-cu ildə, 1857-ci il hadisələrindən 52 il sonra Danimarkanın Kopenhagen şəhərində keçirilən Qadın Sosialist İnternasionalının qurultayında Klara Setkin adlı bir alman sosialist qadını Amerikada 8 martda yandırılaraq öldürülən 129 qadın işçinin xatirəsinə hər il 8 mart gününü Dünya Qadınlar Günü olmasını təklif edib və təklifi qəbul olunub.
İlk dəfə 19 martda Avstriya, Danimarka, Almaniya və İsveçrədə qadınlar bayramı qeyd edilib.
1975-ci ilin 8 martında BMT-də Beynəlxalq Qadınlar Günü keçirilib. İki il sonra, 1977-ci ildə isə nəhayət Birləşmiş Millətlər Təşkilatının Ümumi Qurultayında 8 mart, qadın hüquqları və beynəlxalq sülh günü olaraq qəbul edilib.
8 Mart Beynəlxalq Qadınlar Günü Azərbaycanda hər il qeyd edilir. Hər il bayram günü ərəfəsində dövlət başçısı 8 Mart – Beynəlxalq Qadınlar günü münasibətilə Azərbaycan qadınlarına təbrik ünvanlayır.
