Biləcəri qəsəbəsində sakinlər piyadalar üçün şəraitin olmamasından narazıdır.
Bu barədə Bakuplus.az-a müraciət edən sakinlər bildirir ki, Asəf Zeynallı küçəsində səkilər çox dardır və buna görə küçədə yerimək, xüsusən də uşaq arabası ilə hərəkət etmək mümkün deyil.
Şikayətçilərin sözlərinə görə, küçənin digər hissəsində poliklinika yerləşdiyindən, insanlar məcburən maşın yolundan istifadə edirlər.
"Biləcəridə ümumiyyətlə piyada üçün yol nəzərdə tutulmayıb. Məlik Aslan küçəsində maşınla piyada arasında 1 santimetr məsafə qalır. Sürətlə gələn avtomobilin piyadanı vurmaq riski çox yüksəkdir", – deyə onlar bildirib.
Şikayətçilər həmçinin qeyd edib ki, Biləcəri bələdiyyəsi ərazidə heç bir abadlıq işi görmür: "Nə yollarda zibil qutusu var, nə də səliqə-sahman. Kim harada istəyir, orada da obyekt tikir və yolu daraldır. Soruşanda da hamı deyir ki, icazəsi var."
Sakinlər məsələ ilə bağlı aidiyyəti qurumlardan tədbir görülməsini tələb edirlər.
