Ali Məhkəmədə qəsdən sağlamlığa ağır zərər vurmada təqsirləndirilən Rüfət Pərvanəyevin barəsindəki qərardan verilən kassasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim İlkin Abdullayevin sədrliyi ilə keçirilən prosesdə qərar elan olunub.
Qərara əsasən, kassasiya şikayəti təmin edilməyib, qərar dəyişdirilmədən saxlanılıb.
İttihama görə, hadisə 2024-cü ildə gecə saat 02:30 radələrində Abşeron rayonunun Saray qəsəbəsində baş verib.
Rüfət Pərvanəyev zərərçəkmişin evində usta işləyən Səxi adlı tanışından ona olan pul borcunu almaq üçün həmin ünvana gəlib. Zərərçəkmiş şəxs isə ona irad tutub ki, niyə gec saatda onun evinə gəlib. Mübahisə yaranıb, bu zaman təqsirləndirilən şəxs üzərində gəzdirdiyi cib bıçağını çıxararaq zərərçəkmişə bir dəfə zərbə endirib.
Məhkəmənin hökmü ilə Rüfət Pərvanəyev Cinayət Məcəlləsinin qəsdən sağlamlığa ağır zərər vurma maddəsi ilə təqsirli bilinərək 5 il müddətinə azadlıqdan məhrumetmə cəzasına məhkum edilib. Apellyasiya Məhkəməsi birinci instansiya məhkəməsinin hökmünü dəyişdirib. Apellyasiya instansiyası təqsirləndirilən şəxsə həmin maddə ilə 6 il müddətinə azadlıqdan məhrumetmə cəzası təyin edib.
