25 fevral müasir Azərbaycan estrada sənətinin tanınmış nümayəndələrindən biri, Xalq artisti İlhamə Quliyevanın anım günüdür.
O, səhnəyə qədəm qoyduğu ilk vaxtlardan milli ifaçılıq məktəbinin zəngin ənənələrini davam etdirməklə yanaşı, Azərbaycan estrada sənətinə yeni ab-hava gətirmişdir.
Əmək fəaliyyətinə hələ tələbə ikən müxtəlif musiqi qruplarında çıxışlarla başlayan İlhamə Quliyeva öz istedadı sayəsində musiqi sənətinin incəliklərinə dərindən yiyələnərək tanınmış ifaçılar siyahısında öz yerini alıb. O, 1965-1970-ci illərdə Azərbaycan Dövlət Televiziya və Radio Verilişləri Komitəsinin Estrada-Simfonik Orkestrinin, 1970-1980-ci illərdə Azərbaycan Dövlət Filarmoniyasının solisti olub. Musiqi sənətimizi dünyanın bir çox ölkələrində uğurlu çıxışları ilə təmsil edib.
Müasir Azərbaycan musiqi mədəniyyətimizin inkişaf etdirilməsində danılmaz xidmətləri həmişə layiqincə qiymətləndirilib. O, 1982-ci ildə Azərbaycan Respublikasının Əməkdar, 1998-ci ildə isə Xalq artisti Fəxri adları ilə təltif olunub. 2002-ci ildə Azərbaycanın ali mükafatlarından olan "Şöhrət", 2013-cü ildə isə "Şərəf" ordenlərinə layiq görülüb.
İlhamə Quliyeva 25 fevral 2016-cı ildə tromboemboliyadan vəfat edib.
