Bu gün, oktyabrın 25-də, SSRİ Xalq artisti Müslüm Maqomayevin vəfatından 17 il ötür.
Azərbaycan-sovet opera və estrada müğənnisi 1942-ci il 17 avqust tarixində Bakıda anadan olub. O, musiqiyə böyük həvəs göstərərək 1949-cu ildən Azərbaycan Dövlət Konservatoriyası nəzdindəki musiqi məktəbində təhsil alıb. Müslüm Maqomayev əmək fəaliyyətinə 1962-ci ildə indiki Azərbaycan Dövlət Akademik Opera və Balet Teatrında başlayıb. Həmin ildə o, "La skala" teatrına təcrübə toplamağa göndərilir. Müslüm Maqomayev 1968-ci ildə indiki Üzeyir Hacıbəyli adına Bakı Musiqi Akademiyasını SSRİ Xalq artisti Şövkət Məmmədovanın sinfi üzrə bitirib.
Maqomayev 1975-ci ildə Azərbaycan Dövlət Estrada-Simfonik Orkestrini yaratmış və uzun müddət ona rəhbərlik edib. Həmin orkestrlə o, Sovet İttifaqının müxtəlif şəhərlərində, həmçinin Fransa, Bolqarıstan, Polşa, Finlandiya, Kanada və İranda konsertlər verib.
Müslüm Maqomayevin repertuarında 600-dək əsər mövcuddur. Onların arasında "Azərbaycan", "Свадьба", "Синяя вечность", "Bella, ciao!", "Ana", "Королева красоты" və digər mahnılar var. Ölümündən əvvəl yazdığı sonuncu mahnısı "Əlvida, Bakı" adlanır.
Müğənni 1969-cu ildə Kann festivalında "Qızıl val" mükafatını alıb. Müslüm Maqomayev 31 yaşında SSRİ Xalq artisti fəxri adına və "Qırmızı Əmək Bayrağı" və "Xalqlar Dostluğu" ordenlərinə layiq görülüb. Bundan əlavə, o, Azərbaycan Respublikasının ali mükafatları – "Şöhrət" və "İstiqlal" ordenləri ilə təltif edilib.
O, SSRİ-də ingilis dilində oxumağa icazə verilən yeganə müğənni idi.
Müslüm Maqomayev 25 oktyabr 2008-ci ildə Moskvada vəfat edib. O, Bakıdakı Birinci Fəxri xiyabanda dəfn edilib.
