Azərbaycanda baharın müjdəçisi olan ilk çərşənbə - Su çərşənbəsi fevralın 25-də qeyd edilir.
Novruzun ilk çərşənbəsi ilə bayrama hazırlıqlar başlayır.
Bəzi inanclara görə, Tanrı ilk olaraq suyu yaradıb. Buna görə də ilk olaraq su çərşənbəsi qeyd edilir. Mifik mətnlərdə su həyat verən, dirildən, xoşbəxtlik gətirən müqəddəs bir inam obyektidir. Su çərşənbəsi boz ayın dörd çərşənbəsinin ilkidir. Xalq arasında o, “əvvəl çərşənbə”, “gözəl çərşənbə”, “sular Novruzu”, “gül çərşənbə” kimi də tanınır. Qorxulu yuxuların suya danışılması ilə insanı izləyən qəzaların dəf olunması inamı türk mifoloji mətnlərinin əsasını təşkil edir.
Məhz buna görə su üstündən atlanmaq, arzularını, diləklərini suya danışmaq, sübh tezdən evə bulaq suyu gətirmək və sairə kimi ayinlər bu gün də yaşamaqdadır.
İnanclara görə, sübh tezdən bulaqdan götürülən su min bir dərdin dərmanıdır. Su çərşənbəsi ilə bağlı su falları da mövcuddur.
Su həyat mənbəyi, aydınlıq rəmzidir.
Su çərşənbəniz mübarək!
