Əməkdar artist Coşqun Rəhimov yutub layihələrinin birində qonaq olub.
Bakuplus.az xəbər verir ki, o, verilişdə bir müddət əvvəl həmkarı Tahir İmanovun “Bu şəhərdə”də oynanılan qadın obrazlarını tənqid etməsinə münasibət bildirib.
Aktyor qeyd edib ki, bütün tənqidlərə açıqdır:
“Adından da göründüyü kimi 2 aktyorun teatrıdır. Bütün obrazları oynamaq bizim öhdəmizə düşür. Bu Azərbaycanda bir yenilikdir. Artıq 25-ci ilə gedir. Hələ də sevilirik, qəbul olunuruq. Hələ də küçədə, bayırda olduğumuz yerdə arxamızca söz atan olmayıb. Yenə də bizi hörmətlə, izzətlə qarşılayırlar. O ki, qaldı sənət baxımından qadın obrazlarını oynaya bilirsənsə, meydan açıqdır. Əgər onu təpədən dırnağa qədər qadın kimi təqdim edəcəksənsə, meydan açıqdır. O tənqidlərə mənim heç bir cavabım yoxdur. Çünki tamaşaçı fərqlidir. Bizə dəyər verən, dəstəkləyən tamaşaçımız daha çoxdur”.
Xatırladaq ki, Tahir İmanov "Biz qadın obrazı oynamağı özümüzə yaraşdırmırıq. Aktyorluq bu deyil. "Bu şəhərdə"nin konsertləri müəyyən çərçivədədir. Onların konsertlərində ciddi satira və tənqid yoxdur" ifadələrini işlədib.
