29 iyul Azərbaycanın əməkdar artisti, məşhur aktyor, peşəkar musiqiçi Əli Haqverdiyevin doğum günüdür. O, 1939-cu ildə Bakıda anadan olub. Əli Haqverdiyev yalnız aktyor kimi deyil, həm də istedadlı rəssam və peşəkar vokalçı kimi tanınıb. Əzim Əzimzadə adına Bakı Rəssamlıq Məktəbində, Bülbül adına Musiqi Məktəbində və Azərbaycan Dövlət Konservatoriyasının vokal fakültəsində təhsil alıb. Böyük sənətkar Bülbülün tələbəsi olan Haqverdiyev sonralar Şövkət Məmmədovanın sinfində təhsilini davam etdirib. Maestro Niyazinin diqqətini cəlb edərək Opera və Balet Teatrına dəvət olunması onun sənət həyatında mühüm dönüş nöqtəsi olub. Burada bir sıra məşhur opera və musiqili səhnə əsərlərində obrazlar yaradıb, eyni zamanda uzun illər vokal müəllimi kimi fəaliyyət göstərib.
Əli Haqverdiyevin kino yaradıcılığında isə ən yaddaqalan obrazı, şübhəsiz ki, Tofiq Tağızadənin 1975-ci ildə çəkdiyi "Dədə Qorqud" filmindəki Yalıncıq obrazıdır. Məhz bu rol onu geniş tamaşaçı auditoriyasına tanıdıb və adı uzun illər Yalıncıq obrazı ilə yanaşı çəkilib. Maraqlı məqamlardan biri də budur ki, yaxınlarının xatirələrinə görə, aktyor sonralar bu rola çəkildiyinə görə peşmanlıq hissi keçirirmiş. Səbəb isə küçədə insanların onu tez-tez "Yalıncıq" deyə çağırması və bunun ona xoş təsir etməməsi olub.
Əli Haqverdiyev həmçinin rəssam kimi də fəaliyyət göstərib, qrafik portretlər çəkib və əsərləri sərgilərdə nümayiş olunub. O, yaradıcılığının ən məhsuldar dövründə, cəmi 53 yaşında faciəli şəkildə dünyasını dəyişib. 14 sentyabr 1992-ci ildə dəniz sahilində yüksək gərginlikli elektrik cərəyanının vurması nəticəsində həlak olub.
