Xalq şairi Sabir Rüstəmxanlı Asan TV-yə müsahibəsində deyib ki, Türk dünyasının birliyindən danışırıq, amma Türkiyədə işlədilən bəzi terminlərlə uyğunlaşmaqdan çəkinirik: "Onlar "toplum" deyirlər. Bu söz bizdə də var, amma biz "cəmiyyət" deyirik. Onlar "uluslararası" deyirlər, biz isə "beynəlxalq" deyirik... Türkiyədə süni intellektə "yapay zəka" deyirlər. "Yapmaq" sözü bizdə də işlənir. Biz də bu ifadədən istifadə edə bilərik".
Biz isə, Azərbaycan dilində danışan insanlar, Xalq şairindən soruşmaq istəyirik: Niyə də, niyə? Nə üçün Azərbaycan dilinin başına bu oyunlar açılmalıdır? Az olub? Yenə Ana dilimizi bu dəfə başqa "Böyük qardaşa" qurban verək, "lapet" kimi calayaq "Abilərə"?
Ay balam, demirsiniz "Türk dünyasının birliyi"? Axı nə üçün bu ifadəni hər şeyin Türkiyəyə uyğunlaşdırılması kimi anlayırsınız? Əgər Azərbaycanı da bu dünyanın tərkib hissəsi kimi qəbul edirsinizsə, deməli hər şey paritet əsasında olmalıdır. İndi bu birliyi necə təsəvvür edirsiniz: Qazaxıstan, Qırğızıstan, Özbəkistan lüğətlərini, dillərini Anadolu tükcəsinə uyğun "qayçılıyacaqlar"? Əsla! Etməyəcəklər! Çünki mənlikləri var! Milli qürurları var! Və çox ümid edirəm ki, Azərbaycanda da belə olacaq, o qeyd olunanları hələ bizdə də itirməyənlər kifayət qədərdir. Ana dilimiz restoran menyusu deyil ki, ona yayda pomidor qayğanağı, qışda isə xaş əlavə edək...
