7 avqust Azərbaycan təsviri sənətinin ən görkəmli nümayəndələrindən biri, Azərbaycanın Xalq rəssamı, Dövlət mükafatı laureatı Toğrul Nərimanbəyovun doğum günüdür.
O, 1930-cu ildə Bakıda anadan olub. Nərimanbəyov 1950-ci ildə Əzim Əzimzadə adına Azərbaycan Dövlət Rəssamlıq Məktəbini, 1955-ci ildə isə Litva Dövlət Rəssamlıq İnstitutunu bitirib. Yaradıcılığı boyu rəngkarlıq, monumental sənət, teatr tərtibatı və kitab qrafikası sahələrində mühüm əsərlər yaradıb.
Toğrul Nərimanbəyovun yaradıcılığı parlaq rənglər, güclü emosional ifadə və milli-mədəni motivlərin müasir üslubda təqdimatı ilə seçilir. Onun portret, natürmort, mənzərə və məişət janrında yaratdığı əsərlər Azərbaycanda və dünyanın müxtəlif ölkələrinin muzey və şəxsi kolleksiyalarında qorunur. Rəssam həmçinin bir sıra opera və balet tamaşalarının səhnə tərtibatının müəllifi olub.
Sənətə verdiyi misilsiz töhfələrə görə Toğrul Nərimanbəyov "Əməkdar rəssam", "Xalq rəssamı" kimi yüksək fəxri ad və mükafatlara layiq görülüb. 2010-cu ildə isə Azərbaycanın "Şərəf" ordeni ilə təltif edilib. O, 2 iyun 2013-cü ildə, 82 yaşında Parisdəki xəstəxanada vəfat edib.
