6 fevral aktrisa Töhfə Əzimovanın doğum günüdür.
Bakuplus.az xəbər verir ki, Töhfə İbrahim qızı Əzimova 6 fevral 1938-ci ildə Bakı şəhərində anadan olub və cəmi iki filmə çəkilib.
O, ilk film təklifini rejissor Lətif Səfərovdan alaraq “Qızmar günəş altında” filmində Nərminə obrazını canlandırıb. Həmin vaxt on doqquz yaşı olan gənc Töhfə ali məktəbdə musiqi təhsili alırmış.
Filmin çəkilişləri zamanı Töhfə xanım kino rəssamı Cəbrayıl Əzimovla tanış olub. Əvvəlcə dost olan bu iki gəncin münasibəti sonradan böyük sevgiyə çevrilib və onlar 1958-ci ildə ailə həyatı qurub. Bu evlilikdən onların Elman adlı bir oğlu dünyaya gəlib.
Əzimova 1963-cü ildə “Əhməd haradadır?” filmində Leyla obrazını canlandırıb.
Töhfə xanım bu roldan sonra bütün respublikada, SSRİ məkanında məşhurlaşıb. Lakin aktrisa bu iki filmdən sonra bir daha kamera qarşısına çıxmır və kino sahəsindən uzaqlaşır.
1969-cu ildə 43 yaşlı Cəbrayıl Əzimov yeganə oğlu Elman və onun dostlarını Şıxov çimərliyinə apararkən avtomobil qəzasına düşürək həlak olub.
Ərinin vaxtsız və faciəvi ölümündən sarsılan Töhfə Əzimova oğlunu tək böyüdərək ömrünün sonunadək Bakıdakı 1 nömrəli Musiqi məktəbində fortepianodan dərs deyib.
59 yaşı tamam olanda aktrisa özündə narahatlıq hiss etməyə başlayıb. Həkim müayinələrindən sonra onun başında şiş aşkar edilib.
Beş il evdən çölə çıxmayan Töhfə Əzimova amansız xəstəliyi ilə mübarizə aparsa da, 4 fevral 2003-cü ildə 65 yaşında vəfat edib və Yasamal qəbiristanlığında dəfn edilib.
Kamran Rza
