“Azdrama”nın mətbuat xidməti tərəfindən yayılan açıqlamanı oxudum. Fatma Qədirinin, Leyla Bədirbəylinin, Nəcibə Məlikovanın, Məlik Dadaşovun, Siyavuş Aslanın adlarını çəkməklə sənət tariximizin ən böyük simalarını hazırkı vəziyyətlə müqayisə etmək, onları bu müzakirələrə daxil etmək böyük hörmətsizlikdir! Sənət baxımından div, əjdaha olanları qarışqalarla müqayisə etmək lazım deyil! Bu müqayisəyə görə sənətkarlarımızın ruhu bizi bağışlamaz!”
Bunu Bakuplus.az-a açıqlamasında Əməkdar artist, Akademik Milli Teatrın aktrisası Mehriban Xanlarova deyib.
O bildirib ki, biz teatrımızın dünənini, bu gününü və sabahını düşünərək narahatlığımızı ifadə edirik: “Keçmişdən yox, bugünkü problemlərdən danışırıq! Mən, Münəvvər Əliyeva, Əli Nur və digər peşəkar aktyorlar bu teatrın gələcəyindən narahatıq. Söhbət təkcə bizim narazılığımızdan getmir, kollektivin böyük bir hissəsi bədii rəhbər Mehriban Ələkbərzadənin fəaliyyətindən narazıdır. O, teatrımızın kollektivi ilə dialoq qurmaq əvəzinə, illərdir bu səhnəyə xidmət edən aktyorlara yuxarıdan aşağı münasibət göstərir. Ən pisi isə odur ki, çalışdığı digər teatrın əməkdaşlarını buraya gətirmək niyyətindədir. Biz buna imkan verməyəcəyik!”
Mehriban Xanlarova söyləyib ki, bədii rəhbər yalnız rəhbərin deyil, həm də burada işləyən aktyorların, əməkdaşların fikirlərini dinləməyə borcludur: “Teatr bir insanın şəxsi mülkü deyil, burada çalışanların, bu sənətə ömrünü həsr edənlərin haqqıdır. Biz açıq şəkildə bildiririk ki, bu məsələlərlə bağlı geniş tərkibli iclas keçirilməlidir. Teatr rəhbərliyi kollektivin səsini eşitməli, onların haqlı narazılıqlarına cavab verməlidir! Mən şəxsən heç kimdən qorxmuram və heç kim mənim söz azadlığıma məhdudiyyət qoya bilməz! Mehriban Ələkbərzadə böyük kollektivlə işləyirsə, bütün fikirlərə açıq olmalıdır! İndiki vəziyyət isə göstərir ki, o, ancaq öz baxışlarını diktə etməyə çalışır və bu, teatrımızın gələcəyinə ciddi ziyan vurur. Biz sənətimizi və teatrımızı qorumaq üçün mübarizəmizi davam etdirəcəyik!”
Kamran Rza
