İcbari tibbi sığortanın həkimlərə ödədiyi məbləğlərlə bağlı narazılıq yaranıb.
Bakuplus.az xəbər verir ki, bununla bağlı bir neçə həkim şəxsi sosial şəbəkə hesabında paylaşım edib. Onlardan biri də üz və çənə cərrahı Xəyal Aşurəliyevdir.
O, İcbari Tibbi Sığorta üzrə həkimlərə ödənilən məbləğlərin ciddi əməliyyatlar və riskli xəstələr üçün yetərli olmadığını bildirib. Həmçinin həkim paylaşımında İcbari Tibbi Sığortanı məhkəməyə vermək istədiyini də qeyd edib.
"Sual verəcəyəm hakim bəyə. Hörmətli hakim bəy, əlini qoy vicdanına, lütfən vicdanın ilə cavab ver. Əl boyda qüsurlu bir körpənin 3 saatlıq əməliyyatından 80 manat alacağımı bilə-bilə, bu stresi yaşamaq mənə rəvamıdır?!" – deyə paylaşımda bildirilib.
O, həmçinin qeyd edib ki, belə əməliyyatlarda anestezioloqa ödənilən məbləğ təxminən 20 manat təşkil edir.
Müayinə üçün talonda 25 manat göstərilsə də, həmin məbləğin yalnız 1 manat 80 qəpiyinin həkimə çatdığını iddia edib.
Şikayətçinin sözlərinə görə, riskli xəstələrlə bağlı məsuliyyətin yüksək, ödənişlərin isə aşağı olması bəzi həkimlərin belə pasiyentləri qəbul etməkdən çəkinməsinə səbəb olur.
Həkim baş vermiş başqa bir hadisəni də nümunə kimi göstərib. Onun sözlərinə görə, 9 aylıq, yüksək iltihab göstəriciləri və 40 dərəcə hərarəti olan uşaq gecə saat 23:00-da əməliyyat olunub. Daha sonra uşaq 15 gün ərzində hər gün sarğıya götürülüb və müalicəsi davam etdirilib. Həkim həmin işə görə icbari tibbi sığortadan 32 manat ödəniş alıb.
O, bu məbləğlərin həkimlərin üzərinə düşən məsuliyyət və görülən işlə müqayisədə uyğun olmadığını deyib.
Həkim həmçinin TƏBİB nümayəndəsinin bir dəfə ombudsmanın tapşırığı ilə qüsurlu körpənin əməliyyat olunması üçün onunla əlaqə saxladığını bildirib. O, əməliyyat zamanı uşağın vəziyyətinin ağırlaşacağı təqdirdə məsuliyyət məsələsinin necə həll olunacağını soruşduğunu, bundan sonra isə həmin müraciətlə bağlı yenidən əlaqə saxlanılmadığını qeyd edib.
Şikayətçi hesab edir ki, icbari tibbi sığorta çərçivəsində mürəkkəb və riskli əməliyyatlara görə həkimlərə ödənilən məbləğlər yenidən nəzərdən keçirilməlidir.
