Bu gün kino sənətimizin inkişafında böyük xidmətləri olan görkəmli aktyorumuz, Dövlət mükafatı laureatı, Xalq artisti Həsən Məmmədovun doğum günüdür.
Həsən Məmmədov 1938-ci il noyabrın 22-də Salyan rayonunda doğulub. Burada 2 nömrəli orta məktəbi bitirdikdən sonra Azərbaycan Dövlət Universitetinin (indiki Bakı Dövlət Universiteti) fizika-riyaziyyat fakültəsinə daxil olub. İkinci kursda universitetdən çıxıb və bir müddət müxtəlif teatrların yardım heyətində aktyorluq edib.
1958-ci ildə Mirzağa Əliyev adına Azərbaycan Dövlət Teatr İnstitutunun dram və kino aktyorluğu fakültəsinə daxil olub. Tələbəlik illərində müəyyən fasilələrlə Dövlət Radiosunda diktor işləyib.
1962-ci ildə məşhur səhnə xadimi Mehdi Məmmədovun kursunu bitirib və təyinatla Akademik Milli Dram Teatrına göndərilib.
Kino aktyoru kimi ildən-ilə məşhurlaşan Həsən Məmmədov 1972-ci il fevralın 2-də "Azərbaycanfilm" kinostudiyasına işə qəbul edilib.
O, 1989-cu ildə Cəmil Əlibəyovun "Gülüstanda qətl" dramının tamaşasında "İlyas İbrahimov" rolunu oynayıb. O, Akademik Teatrın direktoru və bədii rəhbəri Həsən Turabovun dəvəti ilə 1992-ci ildən ömrünün sonunadək bu sənət ocağında çalışıb.
Kinoda çəkildiyi rollar Həsən Məmmədovun yaradıcılığında xüsusi yer tutur.
Həsən Məmmədov teatr və kino sənətində göstərdiyi xidmətlərə görə 1971-ci ildə "Əməkdar artist", 1982-ci ildə isə "Xalq artisti" fəxri adlarına layiq görülüb.
"İstintaq" bədii filmindəki "Murad" roluna görə 1981-ci ildə SSRİ Dövlət, "Birisi gün gecəyarısı" kino lentindəki "Baba Əliyev" obrazına görə isə Azərbaycan Respublikasının Dövlət mükafatları ilə təltif edilib.
Görkəmli aktyor 2003-cü il avqustun 26-da vəfat edib.
