Əmisinin 1 milyon manatdan çox pulunu mənimsəməkdə təqsirləndirilən Əsgər Yusifovun (adı, soyadı şərtidir) işi üzrə apellyasiya protestinə baxılıb.
Bakı Apellyasiya Məhkəməsi dövlət ittihamçısının protestini təmin etməyib.
İttihama görə, Əsgər Yusifov tanışı ilə qabaqcadan əlbir olaraq Rusiyada yaşayan və sahibkarlıq fəaliyyəti ilə məşğul olan əmisi Qalib Məlikovun (adı, soyadı şərtidir) ümumilikdə 1 milyon 147 min 500 manatını mənimsəyib. O, əmisinin etibarını qazanaraq bu vəsaiti Azərbaycandan Rusiyaya göndərmək adı ilə iki dəfəyə əldə edib.
İstintaq materiallarına əsasən, mənimsənilən pullar əmisinə qaytarılmaq əvəzinə bahalı hotellərdə və restoranlarda təşkil olunan məclislərə, istirahət mərkəzlərinə, avtomobil alqı-satqısı və icarəsi biznesinə, eləcə də şəxsi ehtiyaclara xərclənib.
Bakı Ağır Cinayətlər Məhkəməsi Əsgər Yusifova 10 il həbs cəzası versə də, Cinayət Məcəlləsinin 70-ci maddəsini tətbiq edərək cəzanı şərti hesab edib və ona 2 il sınaq müddəti təyin edib. Dövlət ittihamçısının hökmdən verdiyi apellyasiya protesti isə təmin olunmayıb.
mənbə: pravda.az
