Sabunçu Rayon Məhkəməsində qəsdən sağlamlığa yüngül zərər vurmada təqsirləndirilən Taryel Kərimzadənin (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az xəbər verir ki, ittihama görə, hadisə Bakı şəhəri, Sabunçu rayonu, Ramana qəsəbəsində qeydə alınıb.
Belə ki, Taryel Kərimzadə yaşadıqları evin qonaq otağında həyat yoldaşı, zərərçəkmiş İnarə Kərimzadəyə (adı, soyadı şərtidir) qarşı ailə-məişət zəminində zorakılıq törədib.
Belə ki, təqsirləndirilən şəxs zərərçəkmiş şəxsin onunla kobud danışaraq irad bildirməsini bəhanə edərək aralarında yaranmış mübahisə zamanı qəsdən yumruqla qadının üz nahiyəsindən bir dəfə vurub. Nəticədə zərərçəkmişin gözündə qansızma meydana gəlib, ona çənə nahiyəsinin dərialtı hematoması ilə müşayiət olunan bədən xəsarətləri yetirilib.
Hadisədən sonra Taryel Kərimzadə saxlanılaraq cinayət məsuliyyətinə cəlb edilib.
Hakim Teymur Həsənovun sədrliyi ilə keçirilən prosesdə hökm oxunub. Məhkəmədə elan edilib ki, tərəflər barışıb, qadının ərindən şikayət və tələbi yoxdur.
Məhkəmənin hökmü ilə o, cinayət məsuliyyətindən azad edilib və cinayət təqibinə xitam verilib.
