Ərinin qətlini sifariş verməkdə təqsirləndirilən Əzizə Seyidova və digər üç nəfərin apellyasiya şikayəti təmin edilməyib.
Bakı Apellyasiya Məhkəməsində hakim Zəfər Əhmədovun sədrliyi ilə keçirilən iclasda birinci instansiya məhkəməsinin hökmü qüvvədə saxlanılıb.
Bakı Ağır Cinayətlər Məhkəməsinin hökmü ilə Mehdi Məmmədov 18 il 6 ay, Bəxtiyar Fərzəliyev və Elvin Əliyev 17 il 6 ay, Əzizə Seyidova isə 17 il müddətinə azadlıqdan məhrum ediliblər.
İttihama görə, hadisə 2023-cü il martın 15-də Sabunçu rayonunun Maştağa qəsəbəsində baş verib. Əzizə Seyidova həyat yoldaşı Əli Seyidlini cəzalandırmaq məqsədilə onun qətlini tanışı Mehdi Məmmədova sifariş edib. Həmin gecə Mehdi Məmmədov dostları ilə birlikdə Əli Seyidlinin evinin yaxınlığında gözləyib və o, evə daxil olmaq istəyərkən 23 bıçaq zərbəsi ilə qətlə yetirilib.
Məhkəmədə Əzizə Seyidova özünü təqsirli bilməyib. Digər təqsirləndirilənlər isə qismən təqsirli olduqlarını bildirərək qətlin sifarişlə deyil, şəxsi münasibətlər zəminində törədildiyini deyiblər.
mənbə: oxu.аz
