Bakının Nizami rayonunda 33 yaşlı kişi arvadına xəsarət yetirib.
Demokrat.az xəbər verir ki, hadisə ötən ilin noyabrın 24-də baş verib. Bakı şəhər sakini Əfsən həmin gün saat 16 radələrində birgə yaşadıqları evdə arvadı Nəsibə ilə (adlar şərtidir – red.) mübahisə edib.
Onların arasında mübahisənin yaranmasına səbəb Nəsibənin mənzildə ev işlərini görməməsi olub. Bu məsələ ilə bağlı Əfsənin arvadına irad bildirməsi nəticəsində aralarında mübahisə yaranıb. Mübahisə zamanı o, əl və ayağı ilə qadının baş və ayaq nahiyələrinə zərbələr endirib. Nəticədə Nəsibəyə sağlamlığın qısa müddətə pozulmasına səbəb olan xəsarətlər yetirilib.
Faktla bağlı Əfsənə Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
İş üzrə izahat verən Əfsən ona elan olunmuş ittiham üzrə özünü təqsirli bilib. O, ifadəsində törətdiyi əməli etiraf edib, barəsində amnistiya aktının tətbiq edilməsini və cinayət işi üzrə icraata xitam verilməsini istəyib.
Nizami Rayon Məhkəməsinin hökmü ilə "Konstitusiya və Suverenlik İli" münasibətilə amnistiya elan edilməsi haqqında Milli Məclisin 19 dekabr 2025-ci il tarixli qərarının müvafiq bəndlərinə əsasən təqsirləndirilən şəxsin barəsində cinayət təqibinə və işin icraatına xitam verilib.
