Nizami Rayon Məhkəməsində qəsdən sağlamlığa yüngül zərər vurmaqda təqsirləndirilən Fahir İmanovun (ad-soyad şərtidir) cinayət işi üzrə hökm oxunub. Məhkəmə onun 1 100 manat cərimə edilməsinə qərar verib.
İttihama görə, hadisə Nizami rayonunda qardaşların birlikdə yaşadığı evdə baş verib. Sərxoş vəziyyətdə evə gələn Famil İmanova qardaşı Fahir irad bildirib və aralarında mübahisə yaranıb. Famil qardaşının ünvanına nalayiq ifadələr işlədib. Bundan əsəbiləşən Fahir onu yerə yıxaraq baş və sifət nahiyəsinə bir neçə dəfə zərbə vurub. Ekspertiza xəsarətləri sağlamlığa yüngül zərər kimi qiymətləndirib.
Fahir məhkəmədə özünü təqsirli bilməyib. O bildirib ki, qardaşına fiziki güc tətbiq etməsinin səbəbi özünü və anasını müdafiə etmək olub. Onun sözlərinə görə, Famil hadisə günü sərxoş halda evə gəlib, anası ona irad bildirəndə qadının üzərinə hücum çəkib. Fahir deyib ki, qardaşının anasına qarşı bu cür davranışı əvvəllər də olub və analoji hallar səbəbindən anası hətta başqa ölkəyə getməyə məcbur qalıb.
Fahir anasını müdafiə etmək üçün qardaşına zərbə endirib yerə yıxdığını, daha sonra polisə məlumat verildiyini deyib. O, baş verənlərdən peşman olduğunu bildirərək məhkəmədən yüngül cəza istəyib.
mənbə: pravda.аz
