Ali Məhkəmədə xuliqanlıqda təqsirləndirilən Azər Rzayevin barəsindəki qərardan verilən kassasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim İlkin Rəcəbovun sədrliyi ilə keçirilən prosesdə qərar elan olunub.
Qərara əsasən, kassasiya şikayəti təmin edilməyib.
İttihama görə, Azər Rzayev 03 oktyabr 2024-cü il tarixdə saat 19 radələrində paytaxtın Sabunçu rayonu ərazisində yerləşən zərərçəkmiş Kənan Kərimova məxsus mağazaya daxil olub. Sonra təqsirləndirilən şəxs zərərçəkmiş şəxsin guya onun evinə gələn şəxslərin fotoşəkillərini çəkdiyini iddia edib. Kənan bunu inkar edib. Anar isə hadisə yerində olan fincanla onu vurub. Bu zərbə nəticəsində Kənanın sol alın-təpə nahiyəsində əzilmiş-cırılmış yara əmələ gəlib. Məhkəmə-tibbi ekspertizasının rəyinə əsasən, xəsarət sağlamlığın qısa müddətə pozulmasına səbəb olub və yüngül dərəcəli bədən xəsarəti kimi qiymətləndirilib.
Sabunçu Rayon Məhkəməsinin hökmü ilə o, 2 il müddətinə azadlıqdan məhrum edilib. Bakı Apellyasiya Məhkəməsinin qərarı ilə apellyasiya şikayəti təmin edilməyib. Daha sonra məhkumun müdafiəçisi tərəfindən həmin qərardan kassasiya şikayəti verilib.
