Azərbaycanda iki azyaşlı övladına işgəncə verən ana və onun qeyri-rəsmi birgə yaşadığı kişi həbs edilib.
34 yaşlı Çinarə Rüstəmova həyat yoldaşından ayrıldıqdan sonra 13 yaşlı qızı və 8 yaşlı oğlu ilə "TikTok"da tanış olduğu, özündən 11 yaş kiçik Tahir Abbasovla yaşamağa başlayıb.
Birgə yaşadıqları müddətdə uşaqlar ağır işgəncələrə məruz qalıblar. Ana və onun birlikdə yaşadığı kişi uşaqları döyüb, əllərini qaynar sobaya yapışdırıb, qızdırılmış qaşıqla yandırıb, gecələr evdən çıxararaq qaranlıqda saxlayıb, saatlarla yemək və sudan məhrum ediblər. Ana qızının dişlərini də qırıb.
Əzablara dözməyən uşaqlar evdən qaçaraq tanımadıqları şəxsin telefonundan atalarına zəng edib kömək istəyiblər. Ata övladlarını taparaq polisə müraciət edib. Ekspertiza zamanı uşaqların bədənlərində çoxsaylı qançırlar, çapıqlar və yanıq izləri, qızın qolunda isə sınıq aşkarlanıb.
Məhkəmədə Tahir Abbasov uşaqlara toxunmadığını iddia edib, ana isə əməllərini etiraf edərək peşman olduğunu bildirib. Uşaqlar isə hər ikisinin cəzalandırılmasını istəyiblər.
Tərtər Rayon Məhkəməsinin hökmü ilə Tahir Abbasov 4 il, Çinarə Rüstəmova isə 3 il müddətinə azadlıqdan məhrum edilib. Lakin ananın cəzasının çəkilməsi azyaşlı övladı yetkinlik yaşına çatana qədər təxirə salınıb.
Prokurorun apellyasiya protestindən sonra Gəncə Apellyasiya Məhkəməsi bu qərarı ləğv edib və Ç.Rüstəmova məhkəmə zalında həbs olunub.
Qeyd edək ki, adlar şərtidir.
mənbə: qafqazinfo.az
